1399. Oktober 27. Oppeln

Wir Ladislaus van gotes genaden Herczog vnd Herre zu Opul etc. Thuen kunt offenlich vnd bekennen, allen den die desin brieff sehen ader horen lesen, das der Ersame her Nicolas Probist zu Czarnewans an eyme, vnd Petrasch Stral am andern teile aller Stosse, broche vnd czweiungen, die sich czwischen yn bis doher vorlawffen haben, mechticlich an vns sein gegangen, In sulcher masse, was wir mit dem Ersamben hern Niclasen Moroczkonis Custode zu Opul, mit hern Petern vnserm Marschalke, vnd mit andern die hernach sten geschreben, czwischen yn awssprechen vnd machten, das sie yn doran wellen vnd sullen lassen genugen. Nu sprechen wir, das Petrasch Stral den Probist van dem gerichte zur Stradun vor eynen herren sal haben, als ander Schultisse seine vorfarn dem Probiste vnd seynen vorfarn gehabt haben, vnschedlich vnsern furstlichen rechten vnd dinsten. Ouch sal Petrasch den Probist, das Conuent, vnd ere lewte vnd vndirsessen doselbist zur Stradun vngehindert lassen, vnd sal sitczen off seinem gerichte in sulchim rechte, als andir schultissen getan haben. Ouch sal her geben dem Probiste czwu marg grosschen off die nesten czukunftigen Ostern vor die banbriue czerunge vnd mühe die doruff sein gegangen. Ouch sal Petrasch dem Probiste alle Jar Jerlichen geben einen steyn vnslet van der huben die her hat in scyner besitczunge, off sante Mertins tage. Ouch was Petrasch dem Probiste vnd dem Conuente van rechte geben sal, is sey vnsleth ader welchirley das sey, das sal her yn gutlichen geben vnd beczalen. Ouch hat der Probost Petraschen gelobt vor vns, In nach seyne frunde, nach alle die dorunter vordacht sein, nymmir zu feden nach angreiffen in keinen weys, vnd Petrasch sal ouch den Probost nach die seynen in semelicher masse als oben stet geschreben, nymmir gefeden nach angreiffen in keynerley mase, vmb die vorlawffen sachen. Vnd ab Petrasch dem Proboste nichten hilde als oben ist begriffen, So mogen wir vnd sullen vns des gutes, das Petrasch hat zur Stradun undirwinden, also lange bis das Petrasch dem Proboste heldet alles des her sich vor vns hat vorlobet. Des zu Orkunde vnd merer sichirheit haben wir vnser Ingesegil an desin brieff lassen hengen, der gegeben ist zu Opul an sante Symonis vnd Jude obende, nach gotes gebord dreyczenhundert Jar, dornach in dem Newnden vnd newncigsten Jare. Dobey sein gewest die Ersamen vnd woltochtigen, her Niclas Moroczkonis van Marschowicz Custos zu Opul, der Prior off dem Berge zu Opul, her Petir Hecht Richter, her Michael vnser Capplan, Miczke Scorupka, vnd Johannes van Kolenstorff, vnser Schreiber, vnd Pfarrer zu Lancznik, dem desir brieff wart befolen.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.